Gudoomiyaha Akadeemiye-Goboleedka AfSoomaaliga (AGA) Prof. Maxamed Daahir Afrax ayaa munaasabad kooban oo ka dhacday magaalada Muqdisho waxa uu haddiyad buug ah ku gudoonsiiyay Gudoomiyaha Aqalka Sare Md, Cabdi Xaashi C/llaahi.
Porf. Afrax oo ka hadlayay munaasabaddaasi ayaa sheegay in buugga la gudoonsiiyay Gudoomiyaha Aqalka Sare uu yahay mid aad u qiima badan, waxaana uu tilmaamay buuggaasi inuu ka hadlayo Taariikh noloeedkii iyo dhaxalkii cilmiyeed ee Danjire Shariif Saalax Maxamed Cali.
Gudoomiyaha Aqalka Sare Md, Cabdi Xaashi oo isna halkaasi ka hadlay ayaa sheegay inuu ku faraxsan yahay buugga dhaxal galka ah ee la gudoonsiiyay, waxaana uu caddeeyay inuu buuggaasi wax badan ka korosan doono, isagoo u mahad celiyay Gudoomiyaha Aga oo buuggaasi u hibeeyay.
Buugga la gudoonsiiyay Gudoomiyaha Aqalka Sare oo lagu magacaabo HALDOOR ayaa waxaa soo saarey Akadeemiye-Goboleedka AfSoomaaliga, waxaana uu ka mid yahay Taxanaha Darsida Afka iyo Suugaanta Soomaalida oo ujeedadiisu ay tahay dhiiri-galinta, taageerida iyo horumarinta dadaalka cilmiyeed ee ku wajahan ururinta, darsida, kaydinta, fidinta iyo horumarinta af-Soomaaliga iyo hal- abuurkiisa fan iyo suugaaneed.
