Maktabadda Akademiya Goboleedka Af Soomaaliga oo ah goob cilmiyeed loogu talaggalay kobcinta akhriska, aqoonfaafinta, dhiirrigalinta qorayaasha iyo turxaanbixinta adeegsiga habdhigaalka af Soomaaliga ayaa loogu deeqay nuqullo ka mid ah buugga Sooyaalka Qowmiyadda Soomaalida oo 6/7/2026, lagu soo bandhigay masraxa Shariif Saalax ee jaamacadda ummadda Soomaaliyeed.

Guddoomiyaha jaamacadda Jobkey Prof. Cabdicasiis Caagane Cabdisamad iyo aqoonyahan Dr. Shuceyb Cabdiraxmaan Cabdulle oo ku hadlayay magaca qalinjabiyaasha ardayda dugsiga Axmed Gurey ayaa in ku dhaw (30) nuqul oo kamid ah buugga Sooyaalka Qowmiyadda Soomaalida ugu deeqay Maktabadda Akademiya Goboleedka Af Soomaaliga.

Agaasimaha waxbarashada Akademiyada iyo maamulka maktabadda AGA C/qaadir Cabdi Axmed (Jubba) iyo Maxamedwali Shiikh Cabdirashiid oo goobjoog ka ahaa munaasabadii lagu wareejinayay nuqullada buugaasi ayaa u mahadnaqay aqoonyahannada buugaagta ugu deeqday maktabadda Akademiya Goboleedka Af Soomaaliga.

MAQAALLO LA XIDHIIDHADHEERAAD AH OO KA SOO QORAAGA