Magaalada Baydhabo ee xarunta Gobolka Bay ayaa 4/01/2020 waxaa laga dhagax dhigay dhisme cusub oo loogu talagalay in uu noqdo Maktabadda Guud ee magaalada Baydhabo, taasi oo dhismaheeda ay iska-kaashanayaan aqoonyahanno iyo ganacsato ka soo jeedda Koonfur Galbeed.
Madaxweynaha Dawlad Goboleedka Koonfur Galbeed Md, Cabdicasiis Xasan Maxamed (Lafta gareen) oo dhagax dhigay dhismaha makatabadaasi ayaa codsadey in la garab istaago dhallinta is xilqaantay ee dooneysa inay hirgeliyaan Maktabadda guud ee magaalada Baydhabo, isagoo baaq u diray Jaaliyadda ka soo jeedda Koonfur Galbeed inay gacan ka geystaan dhismaha maktabaddaasi si loo horumariyo waxbarashada.
Prof. Cabdi Maxamed Kuusow oo isna halkaasi ka hadlay ayaa sheegay in maktabaddaan ay kaalin mug leh ka qaadan doonto sare u qaadidda aqoonta, loona baahan yahay in cid kasta ay ka qeyb-qaadato dhismaheeda.
Qaar ka mid ah dadkii ka qeyb galay munaasabaddaasi ayaa sheegay inay soo dhaweynayaan hirgelinta maktabaddaas oo ay tilmaameen in laga kororsan doono cilmiga.
