Madaxweynaha Dawlad-Goboleedka Puntland Md, Saciid C/llaahi Deni ayaa maanta oo ku beegan 23/7/2019 waxa uu magaalada Garoowe si rasmi ah uga furay carwadii Shanaad ee bandhigga buugaagta Garoowe, taasi oo socon doonto mudoo Seddex maalmood ah.
Madaxweyne Dani oo ka hadlayay furitaankii carwadaasi ayaa sheegay magaalada Garoowe inuu ku soo dhaweynayo aqoonyahannada, qorayaasha, hal-abuurrada, cilmi baarayaasha, suuganyahanka Iyo dhammaan martida ka kala timid Gobollada fog f-og ee dalka, si ay hibadooda ugu biiriyaan bandhigga buugaagta Garoowe, isaga oo caddeeyay inuu ku farxsan yahay in la isku xilqaamo ilaalinta afka, dhaqanka iyo hiddaha ummadda Soomaaliyeed.
“Waa muhiim in wax la qoro, qoraaguna waxaa waajib ku ah inuu noqdaa mid dhex-dhexaad ah oo aan lex-jeclo Deegaan iyo mid Qabiil ka muuqan, waxaana soo jeedinayaa In la akhristo lana iibsado buugaagta, si loo dhiirigeliyo qorayaasha” ayuu yiri Madaxweynaha Puntland oo iftiimiyay ummad kasta oo horumartay inay ku aflaxday aqoon, akhris iyo qoraal.
Furitaankii munaasabaddaasi ka dib, waxaa halkaasi ka bilowday dooddii ugu horreysay ee bandhigga, dood cilmiyeedkaasi oo ku saabsneyd “Dawrka AfSoomaaligu ka qaadan karo Horumarinta Waxbarashada” ayaa waxaa ka qeyb-galay Guddoomiyaha Akadeemiye-Goboleedka AfSoomaaliga (AGA) Dr. Maxamad Daahir Afrax, Prof Mustafa C/llaahi Feyruus oo ka mid ah madaxda Akadeemiyada iyo aqoonyahannada kala ah Dr. Ibraahim Cajaa’ib iyo Eng. Cabdifitaax Cabdullaahi Muuse, dooddaasi oo aad u xiisa badneyd ayaa waxaa xiriirinayay Xoosh Docol Curdan.
Carwadaan oo noqonaysa middii Shanaad ee Garoowe lagu qabto ayaa waxay ka mid tahay bandhigyada kala duwan ee sannad kasta lagu kala qabto magaalooyin ka mid ah wadanka Soomaaliya.
