Xaflad si qurux badan loo soo agaasimay, laguna maamuusayay bandhigga buugga Habdhigaalka Af Soomaaliga Guud (Mideyn, Horumarin iyo Casriyayn), oo uu qorey Barasare Cabdalla Cumar Mansuur, ayna ka soo qeybgaleen Wasiirro, Xildhibaanno, Siyaasiyiin, bahda waxbarashada, naadiyada akhriska iyo qoraalka, maskaxmaal, abwaaanno, qorayaal, aqoonyahanno, waxgarad, iyo marti sharaf kale ayaa habeenkii ay taariikhdu aheyd 2/8/2024, waxaa lagu qabtay magaalada Muqdisho.
Furitaankii munaasabadaas oo si qurux badan loo soo agaasimay ayaa ugu horreyntii waxaa ka hadlay agaasimaha madasha aragtiwadaagga ee Damal Cabdiwahaab Cabdulqaadir Saqa oo ku hadlayay magaca qabanqaabada daahfurka buugga, wuxuuna sheegay inay madasha Damal ku faraxsan tahay daahfurka buugga Habdhigaalka Af Soomaaliga Guud, isaga oo si gaar ah u bogaadiyay qoraha buugaas Barasare Cabdalla Cumar Mansuur,.
Intaas dabadeed waxaa la gudagalay gorfaynta buugga, waxaana buugaas si cilmiyaysan u falanqeeyey aqoonyahannadii iyo xeeldheerayaashii soo akhriyey oo kala ahaa Cabdulqaadir Cabdi Axmed (Jubba), Suldaan Cabdi Siyaad iyo Maxamed Cabdulqaadir Istansa, waxayna ka warbixiyeen cutubyada uu ka kooban yahay buugaasi, nuxurka uu xambaarsan yahay, macluumaadka qiimaha badan ee ku jira iyo faa’iidooyinka uu ummaddaha Soomaaliyeed u leeyahay buugaasi, iyaga oo ku dheeraaday qiimaha iyo waxtarka uu bugaasi ku soo kordhinayo cilmi-afeedka af Soomaaliga.
“Buuggani waa buug aan akhriskiisa laga xiiso dhaceyn, waxaana ku talinaynaa in buuggan lagu daro manhajka waxbarasha waddanka, si ay wax badan uga faa’iideystaan ardayda Soomaaliyeed, sidoo kalana waxaaan soo jeedinaynaa in la dhigo maktabadaha dalalka looga hadlo af Soomaaliga” ayay yiraahdeen aqoonayahannadii faaqidayay buugaasi, iyagoo dhanka kale Barasare Cabdalla Mansuur ku ammaanay sida farshaxannimada ah ee uu u qorey buuggiisa.
Wasiirka waxbarashada, Faarax Shiikh Cabdulqaadir, Wasiiru dawlaha Madaxtooyada Abshir Bukhaari, Wasiir Kuxigeenka Diinta, guddoomiyha guddiga waxbarashada Baarlamaanka, Xildhibaan Mahdi Guuleed iyo Prof. Dhalxa oo idilkood ku hadlayay magaca martida munaasabadaasi ayaa qiray qiimaha buugga Habdhigaalka Af Soomaaliga Guud , waxaana ay hoosta ka xarriiqeen inuu buugani xambaarsan yahay badweyn cilmi ah oo aan laga xiiso dhacayn. Iyagoo qoraaga buugaasi uga mahadnaqay inuu ummaddiisa u soo saaray buug waxtar badan u leh oo dhaxalreeb ah.
Qoraha buugga, ahna Guddoomiyaha Akademiya Goboleedka Af Soomaaliga (AGA) Barasare Cabdalla Cumar Mansuur oo hadal ka jeediyay bandhigga ayaa bulshada la wadaagay mucda buuggiisa, wuxuuna caddeeyay inuu ku faraxsan yahay sida mugga weyn ee looga soo qeybgalay daafurka buugiisa, waxuuna u mahadceliyay dhammaan dadkii ka soo qeybgalay munaasabaddii lagu sharfayay bandhigga buugiisa.
Munaasabadaasi oo aad loo jeclaystay ayaa waxay ku soo dhammaatay jawi aad u xiisa badan iyo saxiix qoraagu buuggiisa u saxiixay dad fara badan oo iibsaday.
