Guddoomiyaha Akdeemiye-Goboleedka AfSoomaaliga “AGA”, Dr Maxamed Daahir Afrax ayaa Maalintii Isniinta oo ku beegneyd 1/10/2018 waxaa uu shir muhiim la qaatay goosan-howleedka Akadeemiyadaas ee ka hawl-gala Xarunta Dhexe ee magaalada Muqdisho.
Dr. Afrax ayaa xubnaha Aga ee magaalada Muqdisho uga warbixiyay socdaalkii iyo howlihii uu u tagay dalalka Ingiriiska iyo Jabuuti, waxaana uu goosanka Aga ee G/Banaadir uu u soo jeediyay inay wax kasta ka hormariyaan hiilka afka hooyo iyo horumarintiisa, maadaama uu afku yahay aqoonsiga ay leedahay ummadda Soomaaliyeed.
Prof. Mustafa C/llaahi Feyruus, Seynab Xaaji Axmed (Ugbaad), C/llaahi Sheikh Cabdi (Gacanka), Cabdi-naasir Yuusuf Macalin, Cali Cigaal, Axmed Maxamed Dhicisow iyo Caaqil Axmed Faarax oo iyaguna halkaasi ka hadlay ayaa ka xog-warramay dhankooda howlihii u qabsoomay intii uu Guddoomiyaha ka maqnaa wadanka.
Shirkaasi oo ku soo gaba-gaboobay jawi aad u wanaagsan ayaa yimid hal maalin kadib markii uu Guddoomiyaha Akadeemiye-Gobeedka ‘AGA’, Dr Maxamed Daahir Afrax uu ka soo laabtay safar uu ku tagay dalalka Jabbuuti iyo Ingiriiska.
