Guddoomiyaha Akadeemiye-Goboleedka AfSoomaaliga (AGA) Dr. Maxamed Daahir Afrax oo la hadlayay 911 arday oo dhammaystay waxbarashada heerka koowaad ee Jaamacadda Somaville ayaa ugu hambalyeeyay ardaydaas guusha ay ka gaareen waxbarashadooda.
Dr. Maxamed Daahir Afrax oo ardaydaas la hadlayay shalay oo ku beegneyd 25/11/2020, ayaa si cilmiyaysan uga warramay qiimaha ay leedahay waxbarashadu, waxaana uu hoosta ka xarriiqay in Jaamacadda Somaville ay ka mug weyn tahay sidii uu filayay, isaga oo Jaamacaddaas ku bogaadiyay in ay soo saartay aqoonyahanno kala duwan.
“Maamulka iyo macallimiinta Somaville waxa aan u soo jeedinayaa inay iska daayaan isticmaalka ereyga Qalin-jabin, waxaana talo ahaan la wadaagayaa inay qaataan Qalin-baddelasho halkii ay ka oran lahaayeen Qalin-jabin, marka la dhammeeyo qeyb ka mid ah waxbarashada ma aha in qalinka la jabiyo ee waa in qalinka la badeshaa, si waxbarashada horey loogu sii wado, fadlan qalinka ha laga daayo jabinta, waxaana idiin soo jeedinayaa in aan qalinka la tuurin oo la sii wado” ayuu yiri Dr. Afrax oo caddeeyay sidaan oo kale inuu horey jaamacado kalana uga sheegay arrintaasi.
Guddoomiyaha AGA ayaa soo dhaweeyay qorshaha cusub ee Jaamacadda Somaville ee ku aaddan inay bilaabayso qeyb cusub oo la xiriirta barashada daraasaadka Soomaaliga (Somali Study), waxaana uu halkaasi ka ballanqaaday in ay Akadeemiye-Goboleedka AfSoomaaliga ay gacan ka siin doonto barashada aqoonta uu xambaarsan yahay Afka Soomaaliga iyo Suugaantiisa, isaga oo ka codsaday Somaville in ay hormuud uga noqoto jaamacadaha kale ee dalka darsidda Afka-Soomaaliga iyo Hal-abuurkiisa.
Warbaahina AGA | Muqdisho
Email: Info@aga.so
