Akadeemiye-Goboleedka AfSoomaaliga (AGA) oo kaashanaya Madasha Maan-kulan ayaa Magaalada Kismaayo si wadajir ah ugu qabtay xaflad uu heerkoodu aad u sarreeyay oo loogu tala galay xuska Maalinta Caalamiga ah ee Afka Hooyo.
Munaasabadda xuskaas oo lagu qabtay hotel Agan, ayaa Waxaa ka soo qaybgalay labada Gole ee Dowlad-Gobaleedka Jubbaland, bahda Jaamacadaha Magaalada Kismaayo Iyo bulshada qaybaheeda kala duwan.
Wasiir Ku-xigeenka Wasaaradda Waxbarashada Jubbaland Cabdirisaaq Axmed Xandal iyo Wasiiru-Dowlaha Wasaaradda Dastuurka Jubbaland Axmed Sitiin oo ka hadlay goobta, ayaa ku dheeraday muhiimada uu Afkeennu leeyahay.
Munaasabaddaas oo si qurux badan loo soo agaasimay waxaa isna ka hadlay Wakiilka AGA ee Jubbaland Md, Xasan Maxamuud Qorane oo sheegay in loo bahan yahay in laga wada qayb qaato kobcinta iyo daryeelka afkeenna hooyo, isaga oo intaa ku daray in dar-dar galinta afkeena iyo sara u qaadista tayadiisu ay tahay masuuliyad-wadareed Soomaalida wada saaran .
Dhanka kale, aqoonyahannadii ka hadlay xafladda, waxaa ka mid ahaa Abshir Colow, Agaasimaha Madaxtooyada Jubbaland iyo Maxamed Xasan Siraad oo Jamacadda Kismaayo ka socday, oo iyaguna ka tariikheeyay muhimadda uu leeyahay afkeenna hooyo iyo sida looga illaalin karo in uu dabar go’o ama ay u soo wajahdo halis, iyaga oo iftiimiyay sida uu afkeenu hodon u yahay .
Intii bur-burka iyo Dowlad la,aanta dalka ka jirtay, dhanka Afka Soomaliga, waxaa ku yimid gaabsi aad u baahsan; waxaana jira dadaalo badan oo lagu doonayo in luuqadda dib loogu xoojiyo, nasiib wanaag waxaa dadaaladaas horseed ka ah Akadeemiye-Goboleedka oo hadafkeedu yahay Horumarinta Afka hooyo iyo hal-abuurkiisa, taasi oo sannadkan si qurux badan ugu guuleysatay inay Magaalada Kismaayo ku qabato xuska maalinta caalamiga ah ee afka hooyo.
