Ra’iisul Wasaaraha Dawladda Federaalka Soomaaliya Eng. Maxamed Xuseen Rooble ayaa ka tacsiyeeyay geeridii naxdinta leh ee ku timid Allaha u naxarsiitee Guddoomiyihii Akadeemiye-Goboleedka AfSoomaaliga (AGA) Dr. Maxamed Daahir Afrax oo 9/10/2021 ku geeriyooday magaalada London.
Eng. Maxamed Xuseen Rooble ayaa sheegay isaga oo ku hadlayo magaciisa iyo kan xukuumaddiisa in uu tacsi tiiraanyo leh u dirayo qoyska, qaraabada iyo dhammaan ummadda Soomaaliyeed ee uu ka baxay Alle ha u naxariistee, Marxuum Maxamed Daahir Afrax oo ahaa halyeeyay door muuqda ka soo qaatay u adeegidda Qaranka Soomaaliyeed, gaar ahaan kobcinta afka iyo qoraalka.
Sidoo kale, geerida Guddoomiyihii Akadeemiye-Goboleedka AfSoomaaliga (AGA) Dr. Maxamed Daahir Afrax waxaa ka tacsiyeeyay Madaxweynayaasha dawlad goboleedyda Puntland iyo Jubbaland Md, Saciid C/llaahi Deni iyo Axmed Maxamed Islaan (Axmed Madoobe) oo marxuumka Alle uga baryay inuu Jannada ka waraabiyo, ummadda Soomaaliyeed iyo qoyskii uu ka baxayna uu Samir iyo iimaan ka siiyo.
Sdioo kale, waxaa ka tacsiyeeyay geerida Dr. Maxamed Daahir Afrax musharaxiinta kala ah Shiikh Shariif Shiikh Axmed, Md, Xasan Cali Kheyre, Danjire Daahir Maxamuud Geelle, Madaxweynihii hore ee Puntland Senator C/raxmaan Faroole, Wasiirka Warfaafinta Senator Cismaan Abuukar Dubbe, Guddoomiyaha G/banadir ahna Duqa Muqdisho Cumar Finish iyo masuuliyiin kale oo isugu jira Wasiirro. Xildhibaanno, Senatorro, Danjirayaal, Agaasiimayaal iyo aqoonyahanno fara badan, kuwaasi oo marxuum Afrax Alle uga baryay inuu jannadda ka waraabiyo.
