Iyada oo wali lagu guda jiro Xuska Toddobaadka Afka Hooyo ayaa Akadeemiye-Goboleedka AfSoomaaliga oo gacan ka haleysa maamulka Jaamacadda Golis ee magaalada Hargeysa waxa ay si wadajir ah ugu qabteen magaaladaas xaflad lagu maamuusayay xuska caalamiga ah ee 21-Febraayo oo ku asteysan maalinta afka hooyo.
Munaasabaddaas ayaa waxaa ka soo qeyb-galay madax ka socotay Laanta Akadeemiye-Goboleedka AfSoomaaliga, maamulka Jaamacadda Golis, macallimiinta iyo ardayda Jaamacaddaas, sidoo kale waxaa xafladaas ka soo qeyb-glay marti sharaf kale oo lagu casuumay.
Wakiilka Laanta Akadeemiye-Goboleedka AfSoomaliga (AGA) ee magaalada Hargaysa Md, Ismaaciil Aw-Aadan (Jaa-juumow) oo ugu horeyntii munaasabaddaasi ka hadlay ayaa sharaxaad dheer ka bixiyay taariikhda iyo marxaladihii uu soo maray afka Soomaaliga , waxaana uu ku dheeraaday qiimiha gaarka ah ee uu leeyahay afka hooyo, faa’iidooyinkii laga dhaxlay qoraalkiisa iyo xilka ummadda oo dhan ka saarran illaalintiisa.
“Akadeemiye-Goboleedka AfSomaaliga waa Hay’ad caalami ah oo u xilsaaran hiilka afkeena hooyo, xuska aan maanta Hargaysa ku qabanayno waxa uu qeyb ka yahay xusas badan oo ay Akdeemiyadu ku kala dhigayso daafyaha caalamka, nasiib wanaag sannadkaan waxay Qaramada Midoobay u aqoonsatey inuu noqdo sannadkii horumarinta afka hooyo, maadaama xuska maalintaan uu labaatan jirsatey” ayuu yiri Wakiilka Aga ee magalaada Hargaysa oo intaasi raaciyay inuu afka hooyo yahay kan qura ee ka qeyb-qaadan karo isfahamka, horumarka iyo dib-u-heshiisiinta bulshada.
Guddoomiye ku-xigeenka jaamacadda Golis ee magaalada Hargaysa Al-ustaad Xasan Cabdi iyo qaar ka mid ah macallimiintii munaasabaddaas ka soo qeyb-galay ayaa si mug leh u soo dhaweeyay xuska maalintaasi, waxayna balan-qaadeen inay diyaar u yihiin ka qeyb-qaadashada daryeelka, dhiirigalinta iyo xuska afka hooyo, iyaga oo caddeeyay inay ka go’an tahay sidii ay ardyada iyo ubadka wax ugu bari lahaayeen afka Soomaaliga.
Qaar ka mid ah suugaanleyda Soomaaliland ayaa munaasabddaas ka soo jeediyay Maanso ka hadlaysay muhiimada uu leeyahay afka hooyo, gaba-gabadii xafladdaasi ayaa lagu balamay inay dhexda loo wada xerto hiilka afka hooyo iyo horumarintiisa.
Sannad walba ayaa 21 Febraayo waxaa laga xusaa magaalada Hargaysa xuska maalinta caalamiga ah ee afka hooyo, waxayna magaaladaas ka mid tahay goobo badan oo Akadeemiye-Goboleedka Aga ay ku kala qabato xuska maalinta afka hooyo.
