Akadeemiye-Goboleedka AfSoomaaliga (AGA) ayaa yeelatay shir balaarran oo looga hadlayay dhamaystirka qorshayaashii u yiilay ee sannadka 2018-ka oo haatan aynu gaba-gabadiisa joogno.
Kulankaasi oo uu shir guddoominayay Guddoomiyaha Akadeemiye-Goboleedka AfSoomaaliga Prof. Maxamed Daahir Afrax ayaa si qoto dheer waxaa looga hadlayay tabbabaradii ugu dambeeyay oo ay qabatey Akadeemiyada, soo saarista caddadkii Afaraad ee Warsidaha Aga, warbixin laga dhagaystay madaxdii Akadeemiyada ee safarka ku tagtay magaalada jig-Jiga iyo qoddobo kale oo aad u xiiso badnaa.
Prof. Afrax oo kulankaasi ka hadlay ayaa ku bogaadiyay xubnaha Aga sida ay ugu soo dhalaaleen meel-marinta qorshayaashii Akadeemiyada u yiilay sannadka sii dhamaanayo ee 2018-ka, waxaana uu carrabka ku dhuftay tabbbabaradii ugu dambeeyay ee ay Aga qabatay bishii November inay ahaayeen tabbabaro lagu guuleystay.
“Dadaalka waa in la sii laba-laabtaan, hawlaha dhiman waa in sida ugu dhaqsiyaha badan loogu dhaqaaqaa, waxaana jeclaan lahaa in aad dhexda u xerataan sidii aad hawlahiina ugu guuleysan laheydeen sannadka cusub ee 2019 ” ayuu yiri Prof Afrax.
Prof. Mustafe C/llaahi Feyruus oo ka mid ah madaxda sare ee Akadeemiyada iyo Xoghaynta Guud ee Aga Seynab Xaaji Axmed (Ugbaad) oo iyaguna kulankaasi ka hadlay ayaa ka warbixiyay shaqooyinkii ugu dambeeyay ee u qabsoomay Goosanka Aga ee Muqdisho iyo hannaankii uu u dhacay safarkii ay madaxda Aga ku tageen magaalada Jig-jiga, iyagoo oo caddeeyay in labada dhinacba guul laga gaarey.
Kulankaas oo ku soo gaba-gaboobay jawi aad u wanaagsan ayaa qeyb waxa uu ka ahaa kulamada joogtada ah oo ay isku xog-wareystaan madaxda iyo xubnaha Aga ee fadhigoodu uu yahay magaalada Muqdisho.
