“Innaa lillaahi wa Innaa Ileyhi raajicuun. Waxa aan tacsi u dirayaa qoyska, qaraabada iyo shacabka Soomaaliyeed ee uu ka geeriyooday, Alle ha u naxariistee, Marxuum Cabdi Muriidi Dheere oo ahaa Jilaa iyo majaajilayste weyn oo soo saari jiray barnaamijyo lagu kobcinayo wacyiga ummadda Soomaaliyeed” ayaa lagu yiri war-saxaafadeed ka soo baxay xarunta AGA.

Akadeemiyada AGA ayaa Marxuumka Alle uga baridey in uu hoygiisa ka yeelo Jannatul Fardowsa, samir iyo iimaanna uu ka siiyo qoyska, ehelada iyo guud ahaan ummadda Soomaaliyeed ee uu ka baxay.

Marxuum Ajakis ayaa ahaa jilaa, majaajilayste iyo Barnaamij soo saare qeyb weyn ka soo qaatay nabadaynta iyo horumarka dalkeenna, isaga oo ummadda Soomaaliyeed u soo gudbin jiray sheekooyin faneed iyo barnaamijyo maan-dhis iyo madadaalo ah oo ka turjumaya jiheynta iyo wacyigelinta bulshada, si looga gudbo caqabadaha iyo dhibaatooyinka nololeed ee bulshadeenna.

The post Akadeemiye-Goboleedka (AGA) oo ka Tacsiyaysay Geerida ku timid Fanaanka Cabdi Muriidi Ajakis appeared first on Akademiye Goboleedka Af Soomaaliga AGA.

Munaasabaddii tartankaasi ayaa ugu horeyntii waxaa ka hadlay Guddoomiyaha jaamacadda Green Hope Prof. Tooxoow oo ku dheeraaday muhiimadda uu leeyahay wax-akhriska, waxaana uu caddeeyay qofba qofka uu ka wax akhris badan yahay in uu ka hodonsan yahay, isaga oo bulshada u soo jeediyay in ay dabeecad ka dhigtaan akhriska iyo qoraalka.

Sidoo kale, waxaa isna halkaasi ka hadlay Guddoomiye Ku-xigeenka naadiga Somali Pen Axmed Maxamed Dhicisoow oo faahfaahin ka bixiyay ujeedka ay tartankaas u qabatay Somali Pen, waxaana uu iftiimiyay in tartankaas looga gol leeyahay kor u qaadista iyo dhiirrigelinta akhriska, si loo abuuro dhaqan ku saabsan dhanka wax-akhriska.

Hadal jeedintaasi kadib, waxaa halkaasi ka bilowday tartankii la xiriiray dhanka akhriska, waxaa ka qeyb-galay dhawr dhallinyaro ah, kuwaasi oo ku loolamayay dhanka wax akhriska.

Tartan adag kadib, waxaa kaalinta 1-aad ee loolankaasi ku guulaystay Maxamed Ibraahim Faarax, kaalinta labaadna waxaa galay Mahad Maxamuud Cabdullaahi, halka uu kaalinta saddexaadna uu galay Rijaal Maxamed-nuur Maxamed.

Guulaystayaashii tartankaasi ayaa la guddoonsiiyay buuggii ay ku tartamayeen ee ahaa sheeka-faneedda Maana-Faay iyo buugaag kale oo ay guulaystayaasha ugu deeqday Akadeemiye-Goboleedka AfSoomaaliga (AGA).

The post Somali Pen iyo Jaamacadda Green Hope oo Qabtay Tartan la Xiriira Dhinaca Akhriska appeared first on Akademiye Goboleedka Af Soomaaliga AGA.

Munaasabaddii furitaanka tartankaasi ayaa waxaa ka soo qeyb-galay masuuliyiin ka socotay hoyga maansada, madaxda golaha abwaannada, aqoonyahanno, ehelada afka, dhaqanka iyo suugaanta, haweenka qaranka iyo iyo marti sharaf kale.

 Abwaan Cismaan C/llaahi Guure oo furitaankii munaasabaddaasi ka hadlay ayaa faahfaahin ka bixiyay sababta tartankaasi loo qabtay, waxaana uu sheegay ujeedada tartankaasi loo qabatay in ay la xiriirto sidii loo soo nooleyn lahaa suugaantii Soomaaliyeed, isaga oo caddeeyay in tartankaasi lagu soo saari doono dad badan oo hibadooda qarsoon tahay.

Guddoomiyaha Golaha Abwaannada Xirsi Dhuux Maxamed, aqoonyahan Prof. Ibraahim Bursaliid iyo Abshiro Axmed oo ka socotay ururka Haweenka Qaranka oo iyaguna halkaasi ka hadlay ayaa ku dheeraaday muhiimada ay suugaantu leedahay, waxayna qireen suugaantu in ay tahay aaladda kaliya ee afkaiyo dhaqanka lagu kaydiyo, iyaga oo u mahad-naqay hoyga maansada  oo isku soo duway tartankaasi.

Mahaa Abuu-samra oo ku hadlaysay magaca Hoyga Maansada ayaa sheegtay in ay ka go’an tahay caawinta bahda suugaanta Soomaaliyeed, iyada oo balanqaaday in ay wax badan ku soo kordhin doonaan suugaanta Soomaaliyeed.

The post Tartanka Gabayada Soomaaliyeed oo ka Furmay Muqdisho appeared first on Akademiye Goboleedka Af Soomaaliga AGA.

Marti-gelin: Laashin

Amminta: Sebtember 26, 2021

Goorta: 08:50 PM (Muqdisho)

Lifaaq:

https://us02web.zoom.us/j/81849698392

Furaha barnaamijka: 818 4969 8392

Ka soo qeyb-galkaagu waa inoo muhiim

The post Falanqeynta Buugga Maana-Faay appeared first on Akademiye Goboleedka Af Soomaaliga AGA.

Boqolaal buug oo ku kala qoran af Soomaali, Ingriisi iyo Carabi ayaa halkaa lagu soo bandhigay, iyada oo ay ka soo qeyb-galeen dadweyne fara badan oo isaga kala yimid daafyaha London, kuwaasi oo saacado badan ku hawlanaa raadinta buugta ay xiiseynayeen. Iyada oo xusid ay mudan tahay in ka badan toban qoraa in ay halkaasi ku soo bandhigeen tacabkoodii, iyaga oo dhanka kale qorayaashaasi ay dadweynaha ugu jawaabayeen su’aalaha ay weydiinayeen.

Waxaa sharaf weyn u ahaa goosanka AGA/SSPEN ee Yurub, gaar ahaan UK in Guddoomiyaha AGA Dr. Maxamed Daahir Afrax iyo Qoraa Siciid Jaamac ay khadka telefoonka uga soo qeyb galaan.

Wakiilka AGA ee UK Dr. Cabdulqaadir Ruumi ayaa furitaankii soo dhaweeyey dadweynihii ka soo qeybgalay carwada, kadibna ku soo dhaweeyey Guddoomiye Afrax oo mahadnaq iyo bogaadin u soo jeediyey ka soo qeybgalayaashii kuna booriyey kor u qaadidda dhaqanka wax akhriska iyo waajibnimada u hiilinta afka hooyo.

Qoraa Siciid Jaamac Xuseen oo ku hadlayey magaca AGA iyo SSPEN ayaa isna xusay muhiimadda kulamada noocan oo kala ah iyo sida ay labadaa hay’adood ay mar walba u garab taagan yihiin inta wax qorta iyo inta wax akhrisaba.

Xiisa gooni ah waxaa lahaa is barashada iyo is dhexgalka halkaa ka muuqatay ee dhex marayey dadka buugta xiiseeya ee goobta joogay, qorayaashii iyo wakiilladii shirkadaha buugta daabaca sida LoohPress, Garanuug, Laashin, Ciid, Kasmo, Galool iyo Xildhiban.

Ugu dambeyntii AGA/SSPEN – UK ayaa ballan-qaaday in carwadu noqon doonto mid sannadle ah haddii Alle idmo.

The post Magaalada London oo lagu Qabtay Carwo Buugeed appeared first on Akademiye Goboleedka Af Soomaaliga AGA.

Laashin waxa la aas-aasay 01.9. 2014ka, waxaa lagu bilaabay mareeg iyo degel lagu qoro qoraallada, magaca laashin waxaa loo xushay ayaa ahaa in uu yahay mid la falgala Afka iyo dhaqanka.

Qeexida magacdhawga Laashin, Laashin waa Hal-abuur gole ka fuul ah oo weliba ku xeeldheer curinta suugaanta, sidoo kale waxaa laashin la odhan karaa, mid walba oo tab iyo xeel u leh farshaxan u gaar ah.

Haddaba Laashin isaga oo ah, hoyga dhaqanka iyo suugaanta, mar haddiiba dhaqan la yidhi Suugaanna la yidhi, waa lama huraan in Hal-abuurihii, Farshaxankii iyo curiyahoodiina la helo, haddaba magacan oo intaas oo ujeeddo isku xambaarsan ayaan u xulanay uguna walqalnay.

Aragtida Laashin iyo bilowgeedu ma aysan bilaaban 2014kii waxaa ka horreeyey wada-tashi badan oo bahda laashin dhexmaray, marka ay arkeen in mareegaha Afka Soomaaligu badankoodu ku hawlan yihiin, gudbinta iyo tebinta wararka joogtada ama dhacdooyinka maalinlaha ah, waxaa loo baahday mareeg ka madax bannaan oo aragtida iyo odoroska bulsho hawsheedu tahay.

Laashin waxaa loo aas-aasay loona dhagax dhigay in lagu kobciyo qoraalka, lagu tayeeyo afka, lagu dhawro dhaqanka, lagu sugo sooyaalka. Laashin mar waa xarun dhaqan, marna waa gole suugaaneed, marna waa madal aqooneed, marka kalena waa dugsi Af barasho.Qof walba  waxa uu rabo iyo xubinta uu jecelyahay ee qoraal wuu ka helayaa.

Gu’ walba waxaa kordhayey tirada dadka aragtidaa ku mideysan, ugu dambayn laashin waxa ay gaadhay in lagu soo biiriyo, gu’gii 2017ka ASLID (madbacad)  taasoo soo saarta buugaagta ay qoraayaashu ugu tala galeen bulshadooda.

Laashin  waxaa ka caagan oo  in lagu falanqeeyo is diidooyinka iyo xadhig jiidka ka dhaxeeya bulshada Soomaaliyeed, waase goob lagu booga dhayo laguna baraarujiyo bulshada, waxaa ka caagan wax walba oo bulshada kala gayn kara, waxaana ka reeban beegsiga koox ama qof, sidoo kale waxaa ka reeban u jiibinta iyo jaamaynta koox ama qof lagu buunbuuniyo.

Bahda laashin waxa ay soo saartay ilaa dabshidkii  buug badan sidoo kale waxaa jira qorayaasha bahda laashin inay soo saareen buugaag qaarkood ka fac weyn yahay mareegta iyo madbacadaba.

Maanta waa Toddobaguuraddi Laashin, sidaa awgeed gu’ walba waxa aan bulshada la wadaagnaa waxii aragti ah ee ku aadan hawlaha iskaa wax u qabso iyo is xilqaanka ah ee ay bahda Laashin bulshada soomaaliyeed u hayaan

Bahda laashin waxa ay ku midaysan yihiin in hantida qarsoon ee aad ciddina dhaadayn, Afka, dhaqanka iyo suugaanta  ay ilaaliyaan baylahdana ka jiraan. Ma jiro is gaashaanbuureysi iyo is urursi kale oo aan ahayn in bulshada Soomaaliyeed dhaxalkeeda loo dhawro loona helo dad u heegan ah oo ilaaliya uruuriyana.

Waxa aan ka wada dheregsanahay in soohdimaha dalka ay ilaashadaan maamulo iyo ciidamo Soomaaliyeed intay doontaba tabartoodu ha ahaatee, sidoo kale diinta waxaa u duuban oo u taagan, wadaado haba kala qaybsanaadaane, haddaba bahda laashin markay aragtey baylahda ka muuqata  Afka, dhaqanka iyo sooyaalka bulsho ayay isu taageen intii awoodi gaadhsiiso inay garab iyo gerger u noqdaan.

Mareegta Laashin waxaa ku soo baxay amminta Lixda dabshid ee ay jirtay 12413 Qoraal oo isugu jira:

Faallooyin

Suugaan

Sheekooyin

Sooyaal

Raadraac

Diini

Madbacada ama Aslida Laashin  waxa ay soo saartay  teer iyo gu’gii 2017-2021 oo kii ugu dambeeyey soo baxay 02. September 2021 tiro buugaag ah oo gaadhaysa 18 Buug oo kala duwan.

Toddoba guurada Laashin ayaa waxaa lagu xushay in lagu baraarujiyo bulshada dhaqanka iyo hiddaheeda iyo Afka, waxaanna dabshidkan halkudheg looga dhigay DHAQAN IYO DHIGAAL. Waxaa dabbaaldegu socday laba habeen waxaanna habeen walba ka qayb galayey, buuniyaal ku xeeldheer afka iyo dhaqanka bulsho kuwaasoo si quman oo qurux badan u soo bandhigay aqoontooda, iyagoo bulshada ugu baaqay in ay ilaashadaan hantidooda ma guurtada ah ee dhaqanka iyo Afka. Sidoo kale ku booriyey in dhigaalka iyo qoraalka la joogteeyo bulshadana baraarugeeda iyo baraadkeeda nafeed kor loo qaado.

Waxaa iyaguna dabshidkaan kaalin weyn ka qaatay naadiyada akhriska ee dalka ka jira, kuwaasoo si weyn u boggaadiyey bahda hawsha ay hayso iyo sida dhaw ee ay ula shaqeyso cid walba oo ku foogan qoris iyo akhris, cid walba oo u taagan tayeynta iyo dhawrista dhaqanka.

Habeennadan ayaa ahaa kuwo bulshada Soomaaliyeed miidoodii laysugu keenay madasha laashin, bahda Laashin waa mid dadka u dhaxaysa, waxaanna ka go’an in la buuxiyo kaalinta maqan iyo doorka bulsho ee hantida ma guurtada ah, Qorista Afka iyo dhiirigelinta aqriska, dhawrista dhaqanka, raadraaca sooyaalka iyo uruurinta aqoonta bulsho, wax kasta oo bulshada Soomaaliyeed leedahay dhur iyo dhaqan.

Hiigsiga Laashin.

Maanta Laashin waa Mareeg iyo madbacad hawsha ay hayaan, waxaa sidoo kale ka mid ah hiigsiga laashin in ay ka hirgeliso dalka gudihiisa xarumo lagu horumariyo dhaqanka iyo Afka, laguna kaydiyo sooyaalka bulshada, mid muuqda iyo mid qarsoonba. Waxaa dabshidyada inagu soo fool leh hiigsiga laashin yahay, marka la dhammeystiro xarumaha in la qabto, tartamo lagu dhiirigelinayo dhallinta iyo da’ dhexaadkaba oo kala ah:

Qoraalka

Tabbabaro dhanka qoraalka ah

Hal abuurka

Ciyaaraha hiddaha iyo dhaqanka

Heesaha

Farshaxanka ILH

Sidoo kale, waxaa ay bahda Laashin u balanqaadaysaa cid walba oo danaynaysa qoraalka in ay ka taageerto, waxaanna ay bahda Laashin balanqaaday in ay furi doonto Tabbobaro  ay ku dhiirigelinayso dhallinta jecel qoraalka farta soomaaliga, habka sheeko curinta, tebinta iyo waxii la halmaala.

Bahda Laashin waxa ay gacmo furan iyo laab xaadhan ku soo dhaweynaysaa cid walba oo rabta in ay ka mid noqoto, una diyaar ah in ay is xilqaanka iyo iska wax u qabsada ay wada ay kala qayb qaadato.

Xigasho: Laashin.com

The post Dabbaal-deggii Toddoba-guuradii Laashin (Dhaqan iyo Dhigaal) appeared first on Akademiye Goboleedka Af Soomaaliga AGA.

Madashaasi oo lagu qabtay aaladda fogaan aragga ee Zoomka ayaa si qaas ah waxaa loogu faaqiday “Akhriska Suugaanta Laga Curiyay Safmarka Covid-19”, iyada oo sidoo kale isla madaashi lagu xasuusanayay haldoorkii uu galaaftay xanuunkaasi, taasi oo qayb ka ahayd bandhigga caalamiga ah ee “Worldwide reading for the dead pandemic, 5th Sep 2021”.

Madashan ayaa waxaa ka soo qayb-galay aqoonyahanno iyo xeeldheerayaal ku kala sugan daafaha caalamka.

Ugu horreyn waxaa madashaas iftiimin kooban ka bixiyay Dr. Maxamed Daahir Afrax, Guddoomiyaha AGA, asaga oo sheegay ujeedka guud ee laga leeyahay xuska loo samaynayo haldoorkii uu galaaftay Covid-19.

Martida waxaa ka mid ahaa masuuliin, abwaanno, qorayaal iyo qaybaha kala duwan ee bulshada. Waxaa halkaasi lagu soo bandhigay shanta tix ee ugu caansan suugaanta laga sameeyay caabuqa Covid-19.

Baashe Yuuuf oo Guddoomiyaha Maxkamadda Sare ee JFS, Xildhibaan Maryan Cariif Qaasim, Xil. Prof Maxamed Cumar Dhalxa, Guddoomiyaha Golaha Abwaannnada Abwaan Xirsi-dhuux Maxamed iyo Macallin Siciid Saalax Axmed oo ka mid ah maqaawiirta Akadeemiyada AGA ayaa halkaas ka soo jeediyay kalmadahooda.

Guddoomiye Baashe ayaa soo jeediyay Maanso uu ka sameeyay Covid-19, taasi oo ka mid ahayd maansooyinka ugu caansan ee la tiriyay.

Sidoo kale laashin Farey iyo abwaanno kale ayaa si farshaxannimo leh ugu luqeeyay maansadii ay ka sameeyeen safmarkan.

Xildhibaan. Maryan Cariif Qaasim oo ka mid ah madaxda AGA ayaa wacyigelin guud ka bixisay cudurkan iyo dhibtiisa, sidoo kale waxa ay madashaasi ka soo jeedisay buraanbur ay ka alliftay dhibaatada cudurkan, ayada oo ugu dambayn u ducaysay haldoorkii ku baxay.

Xildhibaan Dhalxa ayaa isna ka mid ahaa xeeldheerayaasha ka hadlay mowduucaan, waxana uu wax ka taabtay qaar ka mid ah suugaanta laga sameeyay Covid-19.

Madasha ayaa faataxo Alle-tuug ah loogu akhriyay dadkii uu galaaftay cudurkan, gaar ahaan bahdii hal-abuurka.

Ugu dambayn bare sare Siciid Saalax ayaa soo xiray madasha AGA ee bishan Sebtember, asaga oo xusay in AGA ay kaalin wayn ka qaadatay xuskan wayn ee caalamka oo dhan laga sameeyay.

W/Diyaariyay: Qalbi-taajir

The post Akadeemiye-Goboleedka AGA oo ka Qayb-gashay Bandhigga Caalamiga ah ee Suugaanta Karoonaha appeared first on Akademiye Goboleedka Af Soomaaliga AGA.

The post Dhagayso: Dr. Afrax oo laga Wareystay Heshiis ay kala Saxiixdeen Akadeemiye-Goboleedka (AGA) iyo Jaamacadda Ummadda (JUS) appeared first on Akademiye Goboleedka Af Soomaaliga AGA.

The post Daawo: Heshiis Wada-shaqeyn ah (MoU) oo ay kala Saxiixdeen Akadeemiyada AGA iyo Jaamacadda Ummadda appeared first on Akademiye Goboleedka Af Soomaaliga AGA.

Heshiiskaas taariikhiga ah, waxaa dhinaca Akadeemiye-Goboleedka AfSoomaaliga (AGA) u saxiixay Guddoomiyaha Akadeemiye-Goboleedka AGA Dr. Maxamed Daahir Afrax, halka uu Jaamacadda Umaddana uu u saxiixay Guddoomiyaha jaamacaddaasi Bare Sare Xasan Cumar Mahadallah.

Heshiiskaas laba geesoodka ah ayaa waxa uu ku qotomaa sidii ay labada dhinac isaga kaashan lahaayeen horumarinta afka, dhaqanka, aqoon faafinta iyo hal-abuurka Soomaalida.

Guddoomiyaha Akadeemiye-Goboleedka (AGA) Dr. Maxamed Daahir Afrax oo ka hadlay munaasabaddii saxiixa heshiiskaasi ayaa sheegay maanta in ay tahay maalin ku weyn bahda afka, dhaqanka iyo aqoon-faafinta, maadaama ay laba hay’adood oo hormuud ah ay kala saxiixanayaan heshiis iskaashi iyo wada shaqeyn. Waxaana uu iftiimiyay AGA iyo jaamacadda Ummadda heshiiskoodu in uu yahay mid wax badan ku soo kordhin doona aqoon-faafinta Soomaalida.

“Akadeemiye-Goboleedka AGA, waxa ay u xil-saaran tahay daryeelka iyo hiilka afka Soomaaliga, nasiib wanaag waxa badan ayay qabatay, waxaana ka xusi karnaa cilmi baarsita afka iyo hal-abuurkiisa, ku wacyi-galinta bulshada muhiimada uu afku leeyahay, adeegsiga af Soomaali sax ah, tababbar-siinta naadiyada akhriska iyo qoraalka iyo da’yarta kaleba” ayuu yiri Dr. Afrax oo si faahfaahsan uga hadlay muhiimadda uu leeyahay afkeenna hooyo.

Guddoomiyaha Jaamacdda Ummadda Soomaaliyeed Bare Sare Xasan Cumar Mahadallah oo isna halkaasi ka hadlay ayaa sheegay inuu soo dhaweynayo heshiiskaasi taariikhiga ah , waxaana uu hoosta ka xarriiqay in uu heshiiskaasi faa’iido u noqon doono iskaashiga labadaasi hay’adood, isaga oo Guddoomiyaha AGA uga mahad-celiay dadaalkiisa ku aadan nooleynta iyo daryeelka afka Soomaaliga.

Sidoo kale, munaasbadaaasi waxaa ka hadlay labada xildhibaan ee kala ah Xildhibaan Khaalid Macow oo ka tirsan maqaawiirta AGA, kana mid ah macallimiinta jaamacadda Ummadda iyo Xildhibaan Maryan Cariif Qaasin oo iyaduna ka mid ah asaasayaashii iyo maqaawiirta AGA, waxayna halkaasi ka sheegeen in ay ku faraxsan yihiin heshiiska ay kala saxiixden AGA iyo Jaamacadda Ummadda, iyaga oo dhanka kale ka hadlay qiimaha uu leeyahay afka hooyo.

Madaxdaasi ka hor, waxaa halkaasi ka hadlay Guddoomiye Ku-xigeenka  Jaamacdad Ummadda Dr. C/llaahi Shiikh Rashiid (Maki) oo ka sheekeeyay taariikha Jaamacadda Ummadda iyo dadaalkii loo soo galay dib u soo nooleynteeda.

 Mumaasabadaasi oo si qurux loo soo agaasimay ayaa waxa ay ku soo dhammaatay jawi aad u wanaagsan.

The post Akadeemiye-Goboleedka AGA iyo Jaamacadda Ummadda oo kala Saxiixday Iskaashi iyo Wada-shaqeyn (MoU) appeared first on Akademiye Goboleedka Af Soomaaliga AGA.